ॐ आप्यायन्तु ममाङ्गानि वाक्प्राणश्चक्षुः श्रोत्रमथो बलमिन्द्रियाणि च सर्वाणि सर्वं ब्रह्मौपनिषदं माहं ब्रह्म निराकुर्यां मा मा ब्रह्म निराकरोदनिराकरणमस्त्वनिराकरणं मेऽस्तु तदात्मनि निरते य उपनिषत्सु धर्मास्ते मयि सन्तु ते मयि सन्तु ॥
ॐ शान्तिः शान्तिः शान्तिः ॥

oṃ āpyāyantu mamāṅgāni vākprāṇaścakṣuḥ śrotramatho balamindriyāṇi ca sarvāṇi sarvaṃ brahmaupaniṣadaṃ māhaṃ brahma nirākuryāṃ mā mā brahma nirākarodanirākaraṇamastvanirākaraṇaṃ me'stu tadātmani nirate ya upaniṣatsu dharmāste mayi santu te mayi santu ||
oṃ śāntiḥ śāntiḥ śāntiḥ ||

केनेषितं पतति प्रेषितं मनः केन प्राणः प्रथमः प्रैति युक्तः ।
केनेषितां वाचमिमां वदन्ति चक्षुःश्रोत्रं क उ देवो युनक्ति ॥ १ ॥

keneṣitaṃ patati preṣitaṃ manaḥ kena prāṇaḥ prathamaḥ praiti yuktaḥ |
keneṣitāṃ vācamimāṃ vadanti cakṣuḥśrotraṃ ka u devo yunakti || 1 ||

श्रोत्रस्य श्रोत्रं मनसो मनो यद्वाचो ह वाचꣳ स उ प्राणस्य प्राणः ।
चक्षुषश्चक्षुरतिमुच्य धीराः प्रेत्यास्माल्लोकादमृता भवन्ति ॥ २ ॥

śrotrasya śrotraṃ manaso mano yadvāco ha vācam̐ sa u prāṇasya prāṇaḥ |
cakṣuṣaścakṣuratimucya dhīrāḥ pretyāsmāllokādamṛtā bhavanti || 2 ||

न तत्र चक्षुर्गच्छति न वाग्गच्छति नो मनः ।  
न विद्मो न विजानीमो यथैतदनुशिष्यात् ॥ ३ ॥

na tatra cakṣurgacchati na vāggacchati no manaḥ |  
na vidmo na vijānīmo yathaitadanuśiṣyāt || 3 ||

अन्यदेव तद्विदितादथो अविदितादधि ।  
इति शुश्रुम पूर्वेषां ये नस्तद्व्याचचक्षिरे ॥ ४ ॥

anyadeva tadviditādatho aviditādadhi |  
iti śuśruma pūrveṣāṃ ye nastadvyācacakṣire || 4 ||

यद्वाचानभ्युदितं येन वागभ्युद्यते ।  
तदेव ब्रह्म त्वं विद्धि नेदं यदिदमुपासते ॥ ५ ॥

yadvācānabhyuditaṃ yena vāgabhyudyate |  
tadeva brahma tvaṃ viddhi nedaṃ yadidamupāsate || 5 ||

यन्मनसा न मनुते येनाऽऽहुर्मनो मतम् ।  
तदेव ब्रह्म त्वं विद्धि नेदं यदिदमुपासते ॥ ६ ॥

yanmanasā na manute yenā''hurmano matam |  
tadeva brahma tvaṃ viddhi nedaṃ yadidamupāsate || 6 ||

यच्चक्षुषा न पश्यति येन चक्षूꣳषि पश्यति ।  
तदेव ब्रह्म त्वं विद्धि नेदं यदिदमुपासते ॥ ७ ॥

yaccakṣuṣā na paśyati yena cakṣūm̐ṣi paśyati |  
tadeva brahma tvaṃ viddhi nedaṃ yadidamupāsate || 7 ||

यच्छ्रोत्रेण न शृणोति येन श्रोत्रमिदं श्रुतम् ।  
तदेव ब्रह्म त्वं विद्धि नेदं यदिदमुपासते ॥ ८ ॥

yacchrotreṇa na śṛṇoti yena śrotramidaṃ śrutam |  
tadeva brahma tvaṃ viddhi nedaṃ yadidamupāsate || 8 ||

यत्प्राणेन न प्राणिति येन प्राणः प्रणीयते ।  
तदेव ब्रह्म त्वं विद्धि नेदं यदिदमुपासते ॥ ९ ॥

yatprāṇena na prāṇiti yena prāṇaḥ praṇīyate |  
tadeva brahma tvaṃ viddhi nedaṃ yadidamupāsate || 9 ||